ابـــــو مـــوســـــى

بلغ شظايا ياخلف اني ... بخير
واني الى هالحين شبل الشظايا


كان الخطا يحتاج كثرة معاذير
فانا معاذيري بكثر الخطايا


مبطي وانا طبعي قليل مسايير
كثر الغياب اعطى حضوري مزايا


لي بالقلوب فياض حشمة وتقدير
ولي بالعيون رياض صدق ومرايا


ماغرني كثرة حشود الجماهير
ولاغيرت ممشاي كثر التحايا


ماتغري الشهرة ياكود الطراطير
اللي من لباس الرجوله عرايا


في شاعر المليون مليون تفسير
كلن حسب فهمه يصوغ الحكايا


احدن يذم اسمك على ذمة الغير
واحدن يمدح من مديح البرايا


واحدن يدور لك عن اخطاك تبرير
واحدن من اخطائك يسوي سوايا


تخيل ان الناس تعطيك تقرير
عن مايدور بداخلك من نوايا


قل خير والله يكتب اللي به الخير
ماغيـر... ربك عـالـم .... بالخفايا


ان غبت وان ماغبت مامن مخاسير
مثل الشظايا .. دون شبل الشظايا